पेट्रोल-डिझेल दरवाढीविरोधात कम्युनिस्ट पक्ष आक्रमक; प्रशासनाला निवेदन

 

पेट्रोल-डिझेल दरवाढीविरोधात कम्युनिस्ट पक्ष आक्रमक; प्रशासनाला निवेदन 

बातमी

शिरपूर | प्रतिनिधी

पेट्रोल, डिझेल आणि घरगुती गॅसच्या सतत वाढणाऱ्या दरांमुळे सर्वसामान्य नागरिकांचे आर्थिक कंबरडे मोडले असून जीवनावश्यक वस्तूंच्या किमतीतही मोठी वाढ झाली आहे. वाढत्या महागाईमुळे नागरिक त्रस्त झाले असताना इंधन दरवाढीने जनतेच्या अडचणीत आणखी भर पडली आहे. या पार्श्वभूमीवर भारतीय कम्युनिस्ट पक्ष व विविध जनसंघटनांच्या वतीने १ जून रोजी राज्यव्यापी आंदोलन करून उपविभागीय अधिकारी शिरपूर यांना निवेदन देण्यात आले.

जिल्हाधिकारी धुळे यांना उपविभागीय अधिकारी शिरपूर यांच्या मार्फत सादर करण्यात आलेल्या निवेदनात नमूद करण्यात आले आहे की, अल्प कालावधीत पेट्रोल, डिझेल व गॅसच्या दरात वारंवार वाढ करण्यात आल्याने वाहतूक खर्च वाढला असून त्याचा थेट परिणाम अन्नधान्य, भाजीपाला, खत, बियाणे आणि इतर जीवनावश्यक वस्तूंच्या किमतींवर झाला आहे. त्यामुळे सामान्य नागरिकांसह शेतकरी, कामगार आणि विद्यार्थी वर्ग गंभीर आर्थिक संकटाचा सामना करत आहे.

आंदोलनकर्त्यांनी सरकारकडे इंधन दरवाढ तात्काळ मागे घेण्याची मागणी केली आहे. तसेच वाढत्या महागाईवर नियंत्रण आणावे, शेतकऱ्यांच्या ट्रॅक्टरसाठी सवलतीच्या दरात डिझेल उपलब्ध करून द्यावे, स्वस्त दरात खताचा पुरवठा करावा आणि कापसाच्या बोगस बियाण्यांची विक्री करणाऱ्या विक्रेत्यांवर कठोर कारवाई करावी, अशी मागणी करण्यात आली आहे.

याशिवाय पेपरफुटीमुळे पुन्हा परीक्षा देणाऱ्या विद्यार्थ्यांना रेल्वे व एसटी प्रवासात मोफत सवलत देण्यात यावी, कापसावरील आयात शुल्क लागू करावे, आयात शुल्क रद्द करण्याचा निर्णय मागे घ्यावा तसेच शेतीमालाला उत्पादन खर्चावर आधारित हमीभाव (MSP) देण्यात यावा, अशा मागण्याही निवेदनात करण्यात आल्या आहेत.

वाढत्या महागाईमुळे नागरिकांमध्ये तीव्र नाराजी असून सरकारने तातडीने सकारात्मक निर्णय न घेतल्यास आंदोलन अधिक तीव्र करण्याचा इशारा आंदोलकांनी दिला आहे.

#PetrolPriceHike #DieselPriceHike #GasPriceHike #Mahagai #Inflation #CPI #ShirpurNews #DhuleNews #MaharashtraNews #FarmersIssue #MSP #CottonFarmers #FuelPriceHike #IndianCommunistParty #StatewideProtest #BreakingNews #NirbhidVichar #MarathiNews #LatestNews #MaharashtraPolitics

पेट्रोल दरवाढ, डिझेल दरवाढ, गॅस दरवाढ, महागाई, राज्यव्यापी आंदोलन, भारतीय कम्युनिस्ट पक्ष, शिरपूर, धुळे, शेतकरी प्रश्न, एमएसपी, कापूस उत्पादक शेतकरी, बोगस बियाणे, खत पुरवठा, विद्यार्थी प्रश्न, रेल्वे सवलत, एसटी सवलत, महाराष्ट्र बातम्या, जनआंदोलन, इंधन दरवाढ, सर्वसामान्य जनता.