कचऱ्याऐवजी माती भरून लाखोंची लूट; धुळे मनपेविरोधात शिवसेनेचा हल्लाबोल

 

कचऱ्याऐवजी माती भरून लाखोंची लूट; धुळे मनपेविरोधात शिवसेनेचा हल्लाबोल

धुळे प्रतिनिधी -

Shiv Sena (Uddhav Balasaheb Thackeray) च्या वतीने धुळे महानगरपालिकेतील कचरा संकलन प्रक्रियेत मोठ्या आर्थिक गैरव्यवहाराचा गंभीर आरोप करण्यात आला आहे. शहरातील कचरा संकलनाचे वजन कृत्रिमरित्या वाढवण्यासाठी ट्रॅक्टर आणि वाहनांमध्ये कचऱ्याऐवजी माती, दगड आणि बांधकामातील मलबा भरून लाखो रुपयांची फसवणूक होत असल्याचा दावा करण्यात आला आहे. याप्रकरणी संबंधित ठेकेदार कंपनी व संगनमत करणाऱ्या अधिकाऱ्यांवर फौजदारी गुन्हा दाखल करण्याची मागणी करण्यात आली आहे.

शिवसेनेचे जिल्हाप्रमुख अतुल सोनवणे, उपजिल्हाप्रमुख नरेंद्र परदेशी, महानगर प्रमुख धीरज पाटील, तेजस गोटे, संदीप सूर्यवंशी आणि प्रशांत ठाकूर यांनी धुळे शहर पोलीस ठाण्यात यासंदर्भात तक्रार दाखल केली.

धुळे महानगरपालिकेने Bhagyadeeps Waste Management या कंपनीला शहरातील ओला व सुका कचरा संकलनासाठी वार्षिक १८ कोटी रुपयांचा ठेका दिला आहे. करारानुसार १०० घंटागाड्या, ३६ ट्रॅक्टर, पोकलँड आणि डंपर वापरणे बंधनकारक असतानाही प्रत्यक्षात निम्म्याच वाहनांद्वारे काम सुरू असल्याचा आरोप करण्यात आला आहे.

शिवसेनेच्या तक्रारीनुसार, शहरातून दररोज २०८ टन कचरा संकलन अपेक्षित असताना प्रत्यक्षात २६० ते २७० टन कचरा दाखवला जात आहे.

त्यातही ओल्या कचऱ्याचे प्रमाण जाणीवपूर्वक केवळ २५ ते ३० टन दाखवून सुका कचरा तब्बल २३० ते २४० टन दाखवला जात असल्याचा दावा करण्यात आला आहे.

सुक्या कचऱ्याच्या वजनात वाढ करण्यासाठी वाहनांमध्ये माती आणि बांधकामातील मलबा भरला जात असल्याचा आरोपही करण्यात आला आहे.

व्हिडिओ पुरावे सोशल मीडियावर व्हायरल

या कथित गैरव्यवहाराचे अनेक व्हिडिओ समोर आल्याचा दावा शिवसेनेने केला आहे.

१७ एप्रिल २०२६ रोजी नगरसेवक धीरज परदेशी यांनी ट्रॅक्टरमध्ये माती भरतानाचा व्हिडिओ सोशल मीडियावर प्रसिद्ध केला होता.

स्थायी समिती सदस्य कृपेश नांद्रे यांनीही सभेत हा मुद्दा उपस्थित केला होता.

शिवसेना पदाधिकारी संदीप सूर्यवंशी यांनी शिवतीर्थ परिसरात कर्मचाऱ्यांना माती भरताना पकडल्याचा दावा केला आहे.

संबंधित कर्मचाऱ्यांनी “वजन वाढवण्यासाठी ठेकेदारानेच माती भरायला सांगितली,” अशी कबुली दिल्याचा व्हिडिओही व्हायरल झाला आहे.

गेल्या दोन महिन्यांत चार ते पाच वेळा हा प्रकार उघडकीस आल्याचा दावा करण्यात आला असून, महापालिकेकडून दंडात्मक कारवाई झाल्याचेही सांगण्यात आले. तरीही शहरात जागोजागी कचऱ्याचे ढीग साचलेले असून नागरिकांच्या आरोग्याचा प्रश्न गंभीर बनला आहे.

“जनतेच्या कराच्या पैशांवर डल्ला मारणाऱ्या ठेकेदार आणि संबंधित अधिकाऱ्यांवर तात्काळ गुन्हा दाखल करून कठोर कारवाई करावी,” अशी मागणी शिवसेनेने केली आहे.