धुळे, दि. 12 (जिमाका वृत्तसेवा) : भारतीय कापूस निगम (सीसीआय) यांच्यातर्फे धुळे जिल्ह्यात सहा खरेदी केंद्रांना मंजुरी मिळाली असून आतापर्यंत 601 शेतकऱ्यांकडील 18 हजार 780 क्विंटल कापसाची खरेदी करण्यात आली आहे, अशी माहिती जिल्हा उपनिबंधक डॉ. सोपान शिंदे यांनी प्रसिध्दीस दिलेल्या पत्रकान्वये दिली आहे.
भारतीय कपास निगम (सीसीआय) यांच्या मार्फत धुळे जिल्ह्यात कापूस उत्पादक शेतकऱ्यांचा कापूस शासकीय हमी भावाने खरेदीसाठी शिंदखेडा तालुक्यातील वर्धमान जिनिंग प्रेसिंग, अभिषेक जिनिंग प्रेसिंग, शिंदखेडा, केशरानंद जिनिंग प्रेसिंग, दोंडाईचा आणि शिरपूर तालुक्यातील मे. डी. आर. कॉटन, दहिवद रोड चोपडा, शुभम जिनिंग प्रेसिंग, शहादा- चोपडा रोड आणि प्रियदर्शनी सहकारी सूतगिरणी, दहिवद, चोपडा रोड, शिरपूर अशा एकूण सहा कापूस खरेदी केंद्रांना सीसीआयने तत्वत: मंजुरी दिली आहे.
या पैकी वर्धमान जिनिंग प्रेसिंग शिंदखेडा आणि केशरानंद जिनिंग प्रेसिंग, दोंडाईचा येथील सीसीआय संचलित केद्रांवर पाच नोव्हेंबर 2020 पासून कापूस खरेदी सुरू झालेली असून आतापर्यंत 601 शेतकऱ्यांचा 18 हजार 780 क्विंटल कापूस खरेदी करण्यात आला आहे. जिल्ह्यातील बाजार समितीमार्फत कापूस विक्रीसाठी ऑनलाइन पध्दतीने नोंदणी करण्याचे प्रस्तावित आहे. याबाबत जिल्ह्यातील शेतकऱ्यांना कळविण्यात येईल. तूर्त ऑफलाइन रीतीने कापूस खरेदीसाठी बाजार समितीकडून टोकन देण्यात येत आहे. जिल्ह्यातील कापूस उत्पादक शेतकरी बांधवांनी कापूस विक्रीसाठी दोंडाईचा कृषी उत्पन्न बाजार समिती आणि कृषी उत्पन्न बाजार समिती, शिरपूर यांच्याशी संपर्क साधावा, असे आवाहन जिल्हा उपनिबंधक डॉ. शिंदे यांनी केले आहे.
Tags
news