प्रजासत्ताक दिन वर्धापन दिन सोहळा सर्व विभागप्रमुखांनी समन्वयाने जबाबदारी पार पाडावी : जिल्हाधिकारी गंगाथरन डी.

धुळे, दि. 17 (जिमाका वृत्तसेवा) : भारतीय प्रजासत्ताकाच्या 70 व्या वर्धापन दिनानिमित्त 26 जानेवारी 2020 रोजी सकाळी 9 वाजून 15 मिनिटांनी जिल्हा क्रीडा संकुलातील मैदानावर मुख्य शासकीय समारंभ होईल. मा. पालकमंत्री यांच्या हस्ते ध्वजारोहणाचा कार्यक्रम होईल. या पार्श्वभूमीवर सर्व विभागप्रमुखांनी आपल्याला नेमून दिलेली कामे समन्वयाने करीत वेळेत पार पाडावीत, असे निर्देश जिल्हाधिकारी गंगाथरन डी. यांनी दिले आहेत.

जिल्हाधिकारी कार्यालयातील सातपुडा सभागृहात भारतीय प्रजासत्ताकाचा 70 वा वर्धापन दिन साजरा करण्यासाठी पूर्व तयारीची बैठक आज दुपारी आयोजित करण्यात आली होती. त्यावेळी ते बोलत होते. निवासी उपजिल्हाधिकारी संजय गायकवाड,  उपविभागीय अधिकारी भीमराज दराडे (धुळे), उपविभागीय पोलिस अधिकारी सचिन हिरे, तहसीलदार किशोर कदम (धुळे ग्रामीण), अपर तहसीलदार संजय शिंदे (धुळे) यांच्यासह विविध विभागांचे प्रमुख यावेळी उपस्थित होते.

जिल्हाधिकारी गंगाथरन डी. म्हणाले, जिल्हाधिकारी कार्यालयाचा, नवीन प्रशासकीय इमारतीच्या प्रांगणात सकाळी 8 वाजता ध्वजारोहणाचा कार्यक्रम होईल. या पार्श्वभूमीवर जिल्हाधिकारी कार्यालयाचा परिसर संबंधित विभागाने स्वच्छ ठेवावा. क्रीडा संकुलातील मैदानावर मुख्य कार्यक्रम होणार असल्याने मैदानाचे सपाटीकरण व आवश्यक दुरुस्तीच्या कामाला गती द्यावी. मुख्य शासकीय कार्यक्रमाच्या नियोजनासाठी संबंधित कर्मचाऱ्यांची नियुक्ती करावी.

पोलिस विभागाने जिल्हा क्रीडा संकुलातील प्रांगणात सुरक्षेचे नियोजन करावे. श्री भाऊसाहेब हिरे शासकीय वैद्यकीय महाविद्यालयाने ध्वजवंदन कार्यक्रमाच्या ठिकाणी प्रथमोपचारासह सर्व साहित्य, आरोग्य कर्मचाऱ्यांची नियुक्ती करावी. शिक्षण विभागाने मुख्य शासकीय समारंभाकरीता सांस्कृतिक कार्यक्रमांचे नियोजन करीत त्याचा नियमितपणे सराव करून घ्यावा. तसेच सकाळी प्रभात फेऱ्यांचे नियोजन करावे, असेही निर्देश जिल्हाधिकारी गंगाथरन डी. यांनी दिले. निवासी उपजिल्हाधिकारी श्री. गायकवाड यांनीही मार्गदर्शन केले.