जिल्हा नियोजन समितीची 21 जानेवारी रोजी सभा

धुळे, दि. 15 (जिमाका वृत्तसेवा) :  जिल्हा नियोजन समितीची बैठक 21 जानेवारी 2020 रोजी दुपारी 1 वाजता जिल्हाधिकारी कार्यालयातील नवीन नियोजन सभागृहात होणार आहे, असे जिल्हा नियोजन समितीचे सदस्य सचिव तथा जिल्हाधिकारी गंगाथरन डी. यांनी प्रसिध्दीस दिलेल्या पत्रकान्वये कळविले आहे.

धुळे जिल्ह्याचे पालकमंत्री तथा राज्याचे महसूल, ग्रामविकास, बंदरे, खार जमिनी विकास, विशेष साहाय्य विभागाचे राज्यमंत्री अब्दुल नबी सत्तार हे या बैठकीच्या अध्यक्षस्थानी असतील. बैठकीत जिल्हा नियोजन समितीच्या 24 जुलै 2019 रोजी झालेल्या बैठकीमधील इतिवृत्तावरील केलेल्या कार्यवाहीचा अहवाल वाचून कायम करणे, त्यावरील कार्यवाहीचा आढावा घेणे, जिल्हा वार्षिक योजना 2019- 20 (सर्वसाधारण, आदिवासी उपयोजना, आदिवासी क्षेत्राबाहेरील उपयोजना व अनुसूचित जाती उपयोजना) या वार्षिक योजनांचा माहे डिसेंबर 2019 अखेर झालेल्या खर्चाचा आढावा घेणे, जिल्हा वार्षिक योजना 2019- 2020 (सर्वसाधारण, आदिवासी उपयोजना, आदिवासी क्षेत्राबाहेरील उपयोजना व अनुसूचित जाती उपयोजना) पुनर्विनियोजन प्रस्तावास मान्यता देणे, जिल्हा वार्षिक योजना 2020- 2021 (सर्वसाधारण, आदिवासी उपयोजना, आदिवासी क्षेत्राबाहेरील उपयोजना व अनुसूचित जाती उपयोजना) च्या प्रारुप आराखड्यास मान्यता देणे आदी विषयांवर चर्चा होईल, असेही जिल्हाधिकारी गंगाथरन डी. यांनी नमूद केले आहे.