किसान सभेच्या लढ्याला यश! अनेर उजव्या कालव्याचे पाणी अखेर शेतकऱ्यांसाठी सोडले

 

किसान सभेच्या लढ्याला यश! अनेर उजव्या कालव्याचे पाणी अखेर शेतकऱ्यांसाठी सोडले

शिरपूर तालुक्यातील शेतकऱ्यांसाठी दिलासादायक वृत्त समोर आले असून महाराष्ट्र राज्य किसान सभा यांच्या तीव्र आंदोलनानंतर अखेर अनेर धरणाच्या उजव्या कालव्याचे पाणी शेतकऱ्यांसाठी सोडण्यात आले आहे.

आज दिनांक १६ जून २०२६ रोजी महाराष्ट्र राज्य किसान सभेतर्फे पाटबंधारे उपविभाग, शिरपूर कार्यालयासमोर दुपारी १२ वाजता धरणे आंदोलन सुरू करण्यात आले होते. यावेळी उपविभागीय अधिकारी पी. बी. पाटील यांना शेतकऱ्यांच्या मागण्यांचे निवेदन देण्यात आले.

आंदोलनादरम्यान धुळे येथील कार्यकारी अभियंता अग्रवाल यांच्याशी मोबाईलद्वारे किसान सभेचे नेते हिरालाल परदेशी यांनी संपर्क साधून त्वरित आवर्तन सोडण्याची मागणी केली. मात्र, शासनाच्या आदेशाशिवाय निर्णय घेता येणार नसल्याचे उत्तर अधिकाऱ्यांकडून देण्यात आले.

किसान सभेच्या कार्यकर्त्यांनी शिरपूर तालुक्यात सध्या पिण्याच्या पाण्याची टंचाई नसून अनेर धरणातील पाणी आरक्षित नसल्याचे स्पष्ट केले. पाणी न सोडल्यास शेतकऱ्यांचे मोठ्या प्रमाणावर नुकसान होईल आणि त्यास पाटबंधारे विभाग जबाबदार राहील, अशी ठाम भूमिका आंदोलनकर्त्यांनी मांडली.

तसेच शासनाने आदेश न दिल्यास शेतकरी स्वतः एकत्र येऊन अनेर धरणाच्या उजव्या कालव्याचे पाणी सोडतील, असा इशाराही देण्यात आला. अनेर व करवंद धरणावर अवलंबून असलेले बहुतांश शेतकरी गोरगरीब असून अनेक शेतकरी दुसऱ्याच्या शेतावर मजुरी करून आपला उदरनिर्वाह करतात. पिकांचे नुकसान झाल्यास शेतकऱ्यांसमोर गंभीर परिस्थिती निर्माण होईल, असा संतप्त सूर आंदोलनात उमटला.

अखेर किसान सभेच्या ठाम भूमिकेला यश आले असून प्रशासनाने शेतकऱ्यांची मागणी मान्य करत अनेर उजव्या कालव्याचे पाणी सोडण्याचा निर्णय घेतला आहे. या निर्णयामुळे शिरपूर तालुक्यातील शेतकऱ्यांना मोठा दिलासा मिळाला आहे.

#FarmersProtest

#KisanSabha

#WaterForFarmers

#AnerDam

#RightCanal

#IrrigationWater

@MaharashtraStateKisanSabha

@FarmersMovement

@IrrigationDepartment

@MaharashtraGovernment

@DhuleDistrict

@ShirpurTaluka

@AgricultureDepartment

@RuralDevelopment