सरकारी रुग्णालयाचा भयंकर कारभार; उंदरांच्या हल्ल्यात वृद्धेचा मृत्यू”
मीरा-भाईंदर | प्रतिनिधी
मीरा रोड परिसरातील पंडित भीमसेन जोशी शासकीय रुग्णालय येथे घडलेल्या एका धक्कादायक आणि संतापजनक घटनेने संपूर्ण राज्य हादरले आहे. आयसीयूमध्ये व्हेंटिलेटरवर उपचार घेत असलेल्या एका वृद्ध महिलेला उंदराने कुरतडल्याने अतिरक्तस्त्राव होऊन त्यांचा मृत्यू झाल्याची धक्कादायक घटना समोर आली आहे.
मीरा रोड येथील प्लेझंट पार्क परिसरात राहणाऱ्या ८९ वर्षीय सुहासिनी माठेकर यांना प्रकृती अस्वस्थतेमुळे रुग्णालयात दाखल करण्यात आले होते. त्यांची प्रकृती गंभीर असल्याने त्यांना आयसीयूमध्ये व्हेंटिलेटर सपोर्टवर ठेवण्यात आले होते.
मात्र आज सकाळी नातेवाईक भेटीसाठी आयसीयूमध्ये गेले असता त्यांच्या पायाखालची जमीन सरकली. माठेकर यांच्या बेडजवळून उंदीर पळताना दिसला. बेड व फरशीवर रक्ताचे ठसे आढळले. उंदराने त्यांच्या हातावर कुरतडल्याने मोठ्या प्रमाणात रक्तस्त्राव झाला होता. याच अतिरक्तस्त्रावामुळे त्यांचा दुर्दैवी मृत्यू झाला.
या घटनेमुळे सरकारी रुग्णालयातील सुरक्षा आणि स्वच्छतेच्या व्यवस्थेचा पूर्णपणे बोजवारा उडाल्याचे स्पष्ट झाले आहे.
⚖️ प्रशासनाची कारवाई
या घटनेनंतर रुग्णालय प्रशासनाने तातडीने पावले उचलत संबंधित डॉक्टर आणि नर्सेसना कारणेदाखवा नोटीस बजावून त्यांना कार्यमुक्त केले आहे. तसेच या संपूर्ण प्रकरणाच्या चौकशीसाठी समिती स्थापन करण्यात आली असल्याची माहिती वैद्यकीय अधीक्षकांनी दिली.
⚡ राजकीय प्रतिक्रिया
घटना समजताच शिवसेना पदाधिकारी व महिला आघाडीच्या कार्यकर्त्यांनी रुग्णालयात धडक देत तीव्र संताप व्यक्त केला.
“आयसीयूमध्ये रुग्ण सुरक्षित नसतील तर सामान्य नागरिकांनी कुठे जावे?” असा सवाल उपस्थित करत दोषींवर कठोर कारवाईची मागणी करण्यात आली.
❗ प्रशासनाचा अजब दावा
रुग्णालय प्रशासनाने उंदरांच्या प्रादुर्भावाबाबत स्पष्टीकरण देताना आजूबाजूला सुरू असलेल्या बांधकामांमुळे उंदीर रुग्णालयात घुसल्याचा दावा केला आहे. मात्र या स्पष्टीकरणावर संताप व्यक्त होत असून नागरिकांनी याला “जबाबदारी झटकण्याचा प्रयत्न” असे म्हटले आहे.
ही घटना केवळ एका रुग्णाचा मृत्यू नाही, तर संपूर्ण आरोग्य यंत्रणेवरचा कलंक आहे.
रुग्णालयात उपचाराऐवजी मृत्यूचा धोका निर्माण होत असेल, तर ही व्यवस्था किती सुरक्षित आहे, हा मोठा प्रश्न आहे.
HospitalNegligence
#HealthSystemFailure
#MaharashtraNews
#BreakingNews
#NirbhidVichar