पोक्सो कायदयान्वये आरोपितास मा.जिल्हा सत्र न्यायालयाने ठोठावली 10 वर्षे सश्रम कारावासाची शिक्षा व 10 हजार रुपयांचा दंड...!
नंदुरबार जिल्हा प्रतिनिधी सुमित गिरासे
विसरवाडी पोलीस ठाणे हद्दीतील राहणा-या फिर्यादी यांची 8 वर्षीय पिडीत बालिका हिस चुलत काका याने पिडीत बालिकेची आई शेतात गेल्याचे संधी साधून पिडीत बालिकेवर लैंगिक अत्याचार केल्याप्रकरणी विसरवाडी पोलीस ठाणेत भा.द.वि.क.-376(अ)(ब),376(2)(फ) अन्वये सह बालकांचे लैंगिक अपराधापासून संरक्षण अधिनियम 2012 चे कलम 4 व 6 प्रमाणे गुन्हयातील आरोपी (पिडीतेचा काका) याचे विरुध्द गुन्हा नोंदविला होता. व सदरचा गुन्हा गंभीर स्वरुपाचा असल्याने गुन्ह्यातील आरोपी यास तात्काळ अटक करण्यात आली होती.
विसरवाडी पोलीस ठाण्याचे तत्कालीन सहा.पोलीस निरीक्षक श्री. नितीन पाटील यांनी सदरचा गुन्हयाचा तपास पोउपनि-भुषण बैसाणे यांचेकडेस दिला. पोउपनि- भुषण बैसाणे व त्यांचे सहकारी पोलीस यांनी सदर गुन्ह्याचा अत्यंत शास्त्रोक्त पध्द्तीने तपास करीत महत्वाचे पुरावे जमा केले होते. तसेच गुन्हा दाखल झाल्यानंतर आरोपी याचे विरुध्द् मुदतीत दोषारोपपत्र मा. अति.जिल्हा व सत्र न्यायाधीश-2, नंदुरबार यांचे न्यायालयात सादर केले होते.
सदर खटल्याची सुनावणी अति.जिल्हा व सत्र न्यायाधीश-2, नंदुरबार यांचे समक्ष झाली. सदर खटल्यामध्ये सरकार पक्षाचे वतीने साक्षीदार तपासण्यात आले. त्यात पिडीत बालिका **** वय-8 वर्षे, पिडीत बालिकेचे पालक, वैद्यकीय अधिकारी, पंच व तपास अधिकारी यांच्या साक्ष महत्वाच्या ठरल्या आहेत. यावरुन आरोपीविरुध्द गुन्हा सिध्द झाल्याने अति.जिल्हा व सत्र न्यायाधीश-2, नंदुरबार यांनी आरोपीतास भा.द.वि.क.-376 अन्वये दोषी ठरवत दहा वर्ष सश्रम कारावास व रुपये 5000/- दंडाची शिक्षा ठोठावली आहे. तसेच बालकांचे लैंगिक अपराधापासून संरक्षण अधिनियम 2012 चे कलम 4 व 6 प्रमाणे दोषी ठरवत दहा वर्ष सश्रम कारावास व रुपये 5000/- दंडाची शिक्षा ठोठावली आहे.
सदर खटल्याचे कामकाज सरकारी पक्षाचे वतीने अति.सरकारी अभियोक्ता ॲड.श्री.बी.यु.पाटील यांनी काम यांनी पाहिले होते. तसेच पैरवी अधिकारी पोउपनि- राहुल भदाणे, पैरवी अंमलदार पोहेकॉ/170 नितीन साबळे व पोना/947 गिरीष पाटील यांनी कामकाज पाहीले आहे. तपास अधिकारी व त्यांचे पथक तसेच अति.सरकारी अभियोक्ता यांचे नंदुरबार जिल्ह्याचे पोलीस अधीक्षक श्री. श्रवण दत्त. एस, अपर पोलीस अधीक्षक श्री. निलेश तांबे, उप विभागीय पोलीस अधिकारी, नंदुरबार श्री. संजय महाजन यांनी अभिनंदन केले आहे.