गॅस सिलेंडरचा भीषण स्फोट दोन जण गंभीर जखमी डोणगाव येथील घटना मलकापूर - उमेश ईटनारे

: गॅस वेल्डिंगच्या दुकानातील गॅस सिलिंडरचा स्फोट झाल्याने दोन जण गंभीर जखमी झाले . डोणगाव ( ता . मेहकर ) येथील राज्य महामार्गावरील दुकानात आज , ३ फेब्रुवारी रोजी दुपारी दोनच्या सुमारास ही घटना घडली . स्फोट एवढा भीषण होता की शटर व लोखंडी वस्तू पाचशे फुटांच्या वर हवेत उडाल्या होत्या .

प्रत्यक्षदर्शीनी दिलेल्या माहितीनुसार , डोणगाव येथील गजानन यादवराव विढोळे यांच्या राज्य महामार्गावरील ग्रामपंचायत कॉम्प्लेक्सला लागून असलेल्या दुकानात गॅस लीक झाल्याने धूर निघत होता . दुकान बंद होते . त्यामुळे आजूबाजूला लोकांनी गर्दी केली होती . धुराचे रूपांतर आगीत झाल्याने वेल्डिंगच्या दुकानाच्या बाजूला असलेले दुकानमालक सलीम खाँ ताज खाँ ( ५० ) व त्यांचा मुलगा कासिफ खाँ ( २२ ) हे दोघे आग विझविण्याचा प्रयत्न करू लागले . मात्र तेवढ्यात दुकानातील सिलिंडरचा स्फोट झाल्याने दोघे गंभीर जखमी झाले . त्यांना तातडीने मेहकर येथील रुग्णालयात हलविण्यात आले . मेहकर येथून अग्निशामक दलाला पाचारण करण्यात आल्यानंतर आग नियंत्रणात आणण्यात आली . पोलिसांनी घटनास्थळी पोहोचून राज्य महामार्गावरील वाहतूक सुरळीत केली . वृत्त लिहीपर्यंत पंचनाम्याची प्रकिया सुरू होती .