राष्ट्रध्वजाचा अवमान होणार नाही याची दक्षता घ्यावी : पोलिस अधीक्षक प्रवीणकुमार पाटील यांचे आवाहन

धुळे, दि. 24 (जिमाका वृत्तसेवा) : राष्ट्रध्वजाचा अवमान होणार नाही, अशी दक्षता प्रत्येकाने घ्यावी. सामाजिक संस्थांनी राष्ट्रीय ध्वज इतस्त: दिसून आल्यास स्वयंसेवकांच्या माध्यमातून संकलन करून योग्य त्या सन्मानाने विल्हेवाट लावावी, असे आवाहन पोलिस अधीक्षक प्रवीणकुमार पाटील यांनी केले आहे. त्यांनी म्हटले आहे, की राष्ट्रीय सणाच्या दिवशी लहान आकारातील कागदी व प्लास्टिक राष्ट्रध्वजांची मोठ्या प्रमाणत खरेदी व विक्री केली जाते. लहान मुलांसह अनेक व्यक्ती राष्ट्रभक्तीमुळे राष्ट्रध्वज खरेदी करतात. ते ध्वज त्याच दिवशी व दुसऱ्या दिवशी इतस्त: टाकले जाण्याची व त्यामुळे राष्ट्रध्वजाचा अवमान होण्याची शक्यता असते. या पार्श्वभूमीवर सामाजिक संस्थांनी स्वयंसेवकांमार्फत राष्ट्रध्वज संकलित करून त्यांची सन्मानाने विल्हेवाट लावावी, असेही पोलिस अधीक्षक श्री. पाटील यांनी म्हटले आहे.