आ. काशिराम पावरा यांच्या हस्ते नुकसानग्रस्तांना तिन महिन्यांचा किराणा माल वाटप

शिरपूर : तालुक्यातील पळासनेर, गारबर्डी व इतर पाड्यातील नुकसानग्रस्त कुटुंबांना आ. काशिराम पावरा यांच्या हस्ते तिन महिन्यांचा किराणा माल वाटप करण्यात आले.

माजी शालेय शिक्षण, क्रीडा व युवक कल्याण मंत्री आमदार अमरिशभाई पटेल, आमदार काशिराम पावरा, उपनगराध्यक्ष भूपेशभाई पटेल यांच्या वतीने खाजगी स्वरूपात नुकसानग्रस्तांना तिन महिन्यांचा किराणा माल देण्यात आला. गुरुवारी दि. ३ जून रोजी आ. काशिराम पावरा यांनी पळासनेर व गारबर्डी पाडा इतर भागात जाऊन नुकसानग्रस्त कुटुंबांना ३ महिन्यांचे संपूर्ण रेशन किराणा माल वाटप केले.

यावेळी शिरपूर तालुक्याचे आमदार काशिराम पावरा, स्वीय सहाय्यक अशोक कलाल, स्वीय सहाय्यक सुनील जैन, सामाजिक कार्यकर्ते भालेराव माळी, ग्रामस्थ उपस्थित होते.

माजी मंत्री अमरिशभाई पटेल व उपनगराध्यक्ष भूपेशभाई पटेल यांनी नेहमीप्रमाणे शासनाच्या मदतीची कुठली वाट न पाहता खाजगी स्वरूपात तातडीने मदत देण्यासाठी पुढे सरसावले. पटेल परिवार गरजू, गोरगरीब यांच्या मदतीसाठी नेहमीच पुढाकार घेत असतात याची पुन्हा एकदा प्रचिती आली असून नुकसानग्रस्तांनी समाधान व्यक्त केले आहे.

शनिवारी दि. २९ मे रोजी दुपारी शिरपूर तालुक्यातील आदिवासी भागातील काही गावांना वादळी वाऱ्यासह अवकाळी पावसाने जोरदार तडाखा दिला होता. प्रशासनाने सर्व नुकसानग्रस्तांच्या नुकसानीचा पंचनामा करून शासकीय स्तरावरून तातडीने मदत करण्याच्या सूचना देखील देण्यात आल्या आहेत.