सर्वांना शिक्षण हक्क ' प्रवेश प्रक्रियेच्या संथपणामुळे पालक अस्वस्थ,

                                     नाशिक  जिल्हा प्रतिनिधी शांताराम दुनबळे यांजकडून नाशिक -; महाराष्ट्र राज्य नवीन शैक्षणिक धोरणात ' सर्वांना शिक्षण हक्क कायद्याच्या प्रभावी अंमलबजावणीकडे लक्ष केंद्रित केले जात असताना चालू शैक्षणिक वर्षात सर्वांना शिक्षण हक्क कायद्याची अंमलबजावणी करोनाच्या सावटाखाली संथ सुरू आहे . मार्चपासून सुरू झालेली प्रक्रिया सहा महिने उलटूनही अद्याप पूर्ण झालेली नाही . त्यामुळे पालकांमध्ये अस्वस्थता आहे . कागदपत्रे , पालकांची आर्थिक क्षमता , लालफितीचा कारभार अशा अडथळ्यांमुळे या प्रक्रियेस दरवर्षी उशीर होतो . यंदा मार्चमध्ये यासाठी सोडत पद्धत नाकारत थेट विद्यार्थ्यांची निवड करण्यावर भर देण्यात आला ; परंतु करोना संसर्गामुळे ही प्रक्रिया यंदाही रखडली . राज्यातून नऊ हजार ३३१ शाळा या प्रक्रियेत सहभागी झाल्या असून ११ लाख ५४ हजार ४४ ९ विद्यार्थी या प्रक्रियेतून प्रवेश घेऊ शकतील . मार्चमध्ये या संदर्भात ऑनलाइन यादी प्रसिद्ध झाली . नाशिक जिल्ह्यात ४४७ शाळांमधून पाच हजार ५५७ जागा प्रवेशित आहे . सोडत पद्धतीने पाच हजार ३०७ विद्यार्थ्यांचा प्रवेश निश्चित झाला , तर २५० विद्यार्थ्यांचा प्रवेश प्रलंबित आहे . दुसरीकडे ज्या पाच हजार ३०७ विद्यार्थ्यांची निवड झाली त्यातील दोन हजार ६५७ विद्यार्थ्यांचा शाळेत हंगामी प्रवेश झाला , तर समितीने शिक्कामोर्तब केल्याने दोन हजार ३०० विद्यार्थ्यांचा प्रवेश निश्चित झाला आहे . अद्याप प्रलंबित प्रवेशाची संख्या मोठी असताना शिक्षण विभाग मात्र करोनामुळे ही प्रक्रिया काहीशा धिम्या गतीने सुरू असल्याचे सांगत आहे  . शाळेत प्रवेश घ्यावा की प्रक्रिये अंतर्गत आपला क्रमांक येईल याची वाट पाहावी , या द्विधा मनःस्थितीत पालक अडकलेले आहेत . या पार्श्वभूमीवर काही पालकांनी या प्रक्रियेचा पाठपुरावा करणे सोडून दिले आहे . जवळच्या शाळेत आपल्या आर्थिक क्षमतेनुसार माध्यमाची निवड करत ऑनलाइन अभ्यासाला सुरुवात झाली  आहे . ग्रामीण भागात यंदाच्या वर्षी काहींनी मुलांना शाळेत न पाठविता प्रवेश प्रक्रियेपासून दूर राहणेच पसंत केले आहे .