धुळे, : कोरोना विषाणूच्या पार्श्वभूमीवर धुळे जिल्ह्यात अडकलेले स्थलांतरीत कामगार, यात्रेकरू, पर्यटक, विद्यार्थी व अन्य व्यक्तींना धुळे जिल्ह्यातून त्यांच्या इच्छित स्थळी (राज्याबाहेर) जाण्याचे पास, ना हरकत देण्यासाठी आवश्यक असलेली परवानगी देण्यासाठी जिल्हा पुनर्वसन अधिकारी प्रज्ञा बढे- मिसाळ यांची नोडल अधिकारी म्हणून नियुक्ती करण्यात आली आहे. जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष संजय यादव यांनी याबाबतचे आदेश दिले आहेत. राज्य शासनाच्या १ मे रोजीच्या सुधारित आदेशानुसार लॉकडाऊन कालावधीत जिल्ह्यात अडकलेले स्थलांतरीत कामगार, यात्रेकरू, पर्यटक, विद्यार्थी व इतर व्यक्तींना धुळे जिल्ह्यातून त्यांच्या इच्छित स्थळी जाण्यासाठी व धुळे जिल्ह्यात येण्यासाठी आवश्यक आवश्यक असलेली परवानगी देण्यासाठी जिल्हाधिकारी यादव हे सक्षम प्राधिकारी आहेत.या पार्श्वभूमीवर त्यांनी वरील आदेश दिले आहेत. तसेच महाराष्ट्र राज्यांतर्गत प्रशासकीय विभागनुसार पास देण्यासाठी व ना हरकत देण्यासाठी अधिकार्यांना नोडल अधिकारी म्हणून अधिकार प्रदान करण्यात आले आहेत. अशी माहिती प्रसिद्ध केलेल्या पत्रकातून देण्यात आली आहे.