मंदाणे यात्रेला आज पासून प्रारंभ* (प्रकाशा ते मंदाणे दरम्यान काढण्यात आली कावड यात्रा

कल्पेश राजपूत, मंदाणे

शहादा- मंदाणे येथील प्रसिद्ध कृषक दैवत अष्टभुजा शाकंभरी देवीच्या वार्षिक यात्रोत्सवास शुक्रवार , १० जानेवारीला पौष पौर्णिमेपासून प्रारंभ होत आहे . ग्रामपंचायत व मंदिर समितीतर्फे यात्रोत्सवाची तयारी पूर्ण झाली आहे . यात्रेनिमित्त व्यावसायिकांनी दुकाने थाटली असून गावात चैतन्यमय वातावरण निर्माण झाले आहे . शाकंभरी नवरात्रोत्सवानिमित पौष शुद्ध पौर्णिमेला दरवर्षी मंदाणे येथे यात्रा भरते . गेल्या तीन वर्षा पासून दक्षिणकाशी प्रकाशा येथून पायी कावडयात्रेचे आयोजन केले जाते . या पदयात्रेत मंदाणे परिसरातील २०० भाविक सहभागी होतात . ही कावड पदयात्रा मंदाणे येथे पोहोचल्यानंतर वाजत - गाजत मिरवणूक काढून आदिशक्ती शाकंभरी अष्टभूजा माता मंदिरात जलाभिषेक केला जातो . कावड यात्रेत शहादा येथे प्रांताधिकारी डॉ . चेतन गिरासे , तहसीलदार मिलिंद कुलकर्णी , मंदिराचे विश्वस्त अनिल भामरे, दैनिक सकाळचे पत्रकार दिनेश पवार , किरण मोरे पदयात्री सहभागी झाले होते . यात्रेनिमित्त शुक्रवारी सकाळी मंदिरात महाअभिषेक , महापूजा व मुख्य आरती उपसरपंच अनिल भामरे सपत्नीक करणार आहेत . या वेळी ग्रामस्थ व परिसरातील भाविक उपस्थित राहतात . यात्रेनिमित्त मंदिराला रंगरंगोटी व विद्युत रोशणाई करण्यात आली आहे . अष्टभूजा देवीच्या यात्रोत्सवामुळे चैतन्यमय व भक्तीमय वातावरण आहे . यात्रेसाठी प्रशासकीय यंत्रणाही सज्ज झाली आहे . यात्रेत २४ तास बंदोबस्त राहणार असून भाविकांना पिण्याचे पाणी , वैद्यकीय सेवा पुरविण्यात येतात . भाविकांची गर्दी पाहता मंदिराबाहेर बॅरेकेट्स लावले आहेत . दर्शनासाठी भाविकांना टप्प्याटप्प्याने सोडण्यात येते . नारळ फोडण्यासाठी वेगळी व्यवस्था केली असून पाणीपुरवठ्यासाठी नियोजन ग्रामपंचायतीने केले आहे . वीज वितरण कंपनीने वीजपुरवठा खंडित होऊ नये यासाठी कर्मचारी नियुक्त केले आहे . ही यात्रा १५ दिवसांपेक्षा जास्त दिवस भरते . मसाल्याचे पदार्थ , खेळणी , हॉटेल्स , संसारोपयोगी वस्तु , शेती अवजारे आदी व्यावसायिक यात्रेत दुकाने थाटतात . यात्रा काळात नवस फेडण्यासाठी भाविकांची गर्दी होते .