गोरगरिबांसाठीची पशुवैद्यकीय औषधे वाडी शिवारात बेवारस! गंभीर गैरप्रकार उघड
📰 बातमी (प्रतिनिधी)
वाडी शिवारात बेवारस अवस्थेत गुरांसाठी वापरली जाणारी औषधे फेकून दिल्याचा गंभीर प्रकार उघडकीस आला असून, या घटनेमुळे पशुवैद्यकीय विभागाच्या कार्यपद्धतीवर गंभीर प्रश्नचिन्ह निर्माण झाले आहे. सदर औषधे गावकऱ्यांच्या निदर्शनास आल्यानंतर त्यांनी तत्काळ धुळे येथील उपायुक्तांशी दूरध्वनीवर संपर्क साधला. याची दखल घेत उपायुक्तांनी पंचनामा करण्याचे आदेश दिले.
यानंतर घटनास्थळी विस्ताराधिकारी व पशुसंवर्धन विभागाचे कर्मचारी उपस्थित राहून पंचनामा करण्यात आला. मात्र, या पंचनाम्यामुळे प्रश्न सुटण्याऐवजी अनेक गंभीर शंका अधिकच गडद झाल्या आहेत.
सदर औषधे ही सरकारी पशुवैद्यकीय कोठ्यातील आहेत का?
ती मुदत संपलेली होती की वापरण्यायोग्य होती?
मुदत संपली असेल तरी ती अधिकृत प्रक्रियेनुसार नष्ट न करता उघड्यावर, बेवारसपणे का फेकण्यात आली?
आणि जर औषधे वापरण्यायोग्य असतील, तर गोरगरिब शेतकरी व पशुपालकांच्या जनावरांच्या उपचारासाठी ती का वापरण्यात आली नाही?
या सर्व प्रश्नांमुळे हा केवळ निष्काळजीपणा नसून सरकारी मालमत्तेच्या अपव्ययाचा गंभीर प्रकार असल्याचा संशय व्यक्त केला जात आहे. एकीकडे ग्रामीण भागात पशुपालकांना वेळेवर उपचार व औषधे मिळत नसल्याच्या तक्रारी असताना, दुसरीकडे सरकारने पुरवलेली महत्त्वाची औषधे रस्त्यावर फेकली जात असल्याचे चित्र अत्यंत संतापजनक व चिंताजनक आहे.
घटनास्थळी अधिकाऱ्यांनी प्राथमिक चौकशी केली असली तरी ही चौकशी नेमकी कोणत्या दिशेने जाते, समिती काय निष्कर्ष काढते आणि दोषींवर कारवाई होते की प्रकरण दडपले जाते, याकडे संपूर्ण परिसरातील गावकऱ्यांचे लक्ष लागून आहे.
या प्रकरणाची स्वतंत्र व सखोल चौकशी करून दोषी अधिकारी व कर्मचाऱ्यांवर तात्काळ निलंबन व गुन्हे दाखल करण्याची कारवाई करावी, अशी जोरदार मागणी परिसरातून पुढे येत आहे. अन्यथा अशा प्रकारांमुळे प्रशासनावरील विश्वास ढासळण्याची भीती व्यक्त केली जात आहे.