वीज तोडली, मेणबत्ती पेटली अन् घर जळून खाक! पिंपळे पुनर्विसनमधील गरीब कुटुंब रस्त्यावर
📰 सविस्तर बातमी
पिंपळे पुनर्विसन | प्रतिनिधी
पिंपळे पुनर्विसन गावात आज एक अत्यंत हृदयद्रावक घटना घडली असून, देविदास महादू जाधव या गरीब कुटुंबाच्या घराला रात्री भीषण आग लागून संपूर्ण घर जळून खाक झाले. या दुर्घटनेत सुदैवाने जीवितहानी टळली असली, तरी घरातील सर्व संसारोपयोगी साहित्य, कपडे, धान्य, महत्त्वाची कागदपत्रे आगीत भस्मसात झाली असून जाधव कुटुंब अक्षरशः रस्त्यावर आले आहे.
मिळालेल्या माहितीनुसार, देविदास जाधव यांची पत्नी काही दिवसांपासून सिव्हिल हॉस्पिटल, धुळे येथे उपचार घेत आहे. त्यामुळे पती-पत्नी दोघेही रुग्णालयात असताना घरी त्यांची तीन लहान मुले एकटीच होती. याच काळात महावितरण विभागाकडून वीज बिल भरण्याबाबत फोनद्वारे तगादा लावण्यात आला. उपचारामुळे आर्थिक अडचणीत असलेल्या जाधव यांनी काही दिवसांची मुदत मागितली; मात्र ती न देता वीज कनेक्शन तोडण्यात आले.
वीज नसल्यामुळे मुलांनी रात्री मेणबत्ती लावली होती. झोपेत असतानाच मेणबत्तीमुळे अचानक आग लागली आणि काही क्षणांत संपूर्ण घर आगीच्या भक्ष्यस्थानी गेले. शेजाऱ्यांच्या मदतीने मुलांना बाहेर काढण्यात आले, त्यामुळे मोठा अनर्थ टळला.
घटनेची माहिती मिळताच सामाजिक कार्यकर्ते जितेंद्र राठोड यांनी तात्काळ घटनास्थळी भेट देऊन कुटुंबाची विचारपूस केली व मदतीची मागणी केली. त्यानंतर आमदार काशीराम पवार यांना संपूर्ण प्रकरणाची माहिती देऊन शासनस्तरावर तातडीची आर्थिक व पुनर्वसन मदत मिळावी, अशी मागणी करण्यात आली.
तलाठी व ग्रामसेवकांना पंचनामा करण्याचे निर्देश देण्यात आले असून पंचनामा पूर्ण झाला आहे. मात्र, मदत कधी मिळणार याकडे हे कुटुंब डोळे लावून बसले आहे.
✊ “संकटाच्या काळात एकत्र येऊया”
या घटनेमुळे संपूर्ण गावात हळहळ व्यक्त होत असून, ग्रामस्थ, समाजप्रेमी नागरिक, स्वयंसेवी संस्था व लोकप्रतिनिधींनी पुढे येऊन अन्नधान्य, कपडे, भांडी, आर्थिक मदत व तात्पुरत्या निवासाची व्यवस्था करण्याचे आवाहन करण्यात येत आहे.