🌿 वृक्षप्रेम, पर्यावरणसेवा आणि सामाजिक कार्याचा जीवंत झाडोरा – ‘वृक्षमित्र’ शिवाजी राजपूत यांना वाढदिवसानिमित्त सकाळ गौरवगाथा पुरस्काराचा सन्मान! 🌿

 

🌿 वृक्षप्रेम, पर्यावरणसेवा आणि सामाजिक कार्याचा जीवंत झाडोरा – ‘वृक्षमित्र’ शिवाजी राजपूत यांना वाढदिवसानिमित्त सकाळ गौरवगाथा पुरस्काराचा सन्मान! 🌿

शिरपूर (महेंद्रसिंह राजपूत) –

शेतकऱ्यांच्या उत्कर्षासाठी, पर्यावरणाच्या रक्षणासाठी आणि समाजहितासाठी स्वतःचे जीवन वाहून घेतलेले ‘वृक्षमित्र’ शिवाजी राजपूत यांना वाढदिवसानिमित्त एक अत्यंत सन्माननीय भेट लाभली आहे. सकाळ माध्यम समूहातर्फे त्यांच्या कार्याची दखल घेत ‘सकाळ गौरवगाथा’ या उपक्रमांतर्गत त्यांचा नुकताच नाशिक येथे विशेष सन्मान करण्यात आला. हा पुरस्कार कायदेपंडित विशेष सरकारी वकील उज्ज्वल निकम, हास्य कलाकार श्यामसुंदर राजपूत, सकाळचे महाव्यवस्थापक पंकज पिसोळकर, संपादक अजय सुपेकर आणि संजय पाटील यांच्या हस्ते प्रदान करण्यात आला.

शिवाजी राजपूत हे नाव आज केवळ शिरपूरच नव्हे, तर संपूर्ण महाराष्ट्रात सामाजिक बांधिलकी, पर्यावरण रक्षण आणि प्रयोगशील शेती या बाबतीत एक आदर्श म्हणून घेतले जाते. वाढदिवस अथवा कोणताही खास दिवस असो, वृक्ष लागवडीच्या माध्यमातून तो साजरा करण्याचा त्यांनी घेतलेला वसा आज हजारोंसाठी प्रेरणादायी ठरला आहे.

त्यांच्या पुढाकारामुळे शिरपूर तालुक्यात हजारो झाडे लावली गेली असून, त्यांची जोपासना, संरक्षण व वाढीसाठी राजपूत स्वतः सजग असतात. "लावलेलं झाड जगवणं हाच खरा धर्म" या विचारातून त्यांनी ‘वृक्षमित्र’ ही ओळख कमावली आहे.

राजपूत हे बांबू लागवडीतही नावलौकिक प्राप्त केलेले अग्रणी शेतकरी असून, राज्यात बांबूपासून तयार होणाऱ्या विविध उत्पादनांविषयी त्यांनी शेतकऱ्यांमध्ये जागरूकता निर्माण केली आहे. कृषी दिन हा राजकीय सभा किंवा घोषणांच्या गडगडाटात नाही, तर शेतकऱ्यांच्या समस्या, पर्यावरण, शेतीच्या नव्या संधी यावर संवाद साधत साजरा करण्याचा त्यांनी घेतलेला पुढाकार कौतुकास्पद आहे.

त्यांच्या कार्याची दखल घेत राज्य, देश आणि आंतरराष्ट्रीय स्तरावरही त्यांना विविध पुरस्कारांनी सन्मानित करण्यात आले आहे. पर्यावरण संवर्धन, सामाजिक समरसता, शेतकऱ्यांच्या आर्थिक स्वावलंबनासाठी नवे प्रयोग, आणि त्यातून घडवलेली जनजागृती यासाठी शिवाजी राजपूत यांचे योगदान अनमोल आहे.

आज त्यांच्या वाढदिवसानिमित्त शिरपूर तालुक्याच्या मातीने घडवलेल्या या हिरव्या योद्ध्यास केवळ शुभेच्छाच नव्हे, तर त्यांच्यामुळे उजळून निघालेल्या माणुसकीच्या सावलीला वंदन करणे हे आपल्या सर्वांचे कर्तव्य आहे.

वाढदिवसानिमित्त त्यांना मनःपूर्वक शुभेच्छा –

“जगणं झाडांसोबत, समाजासाठी झिजणं, आणि माणुसकीची पाळंमुळं घट्ट रोवणं हेच तुमचं खरं कार्य!” 🌱 या कार्यास मानाचा मुजरा आणि पुनश्च एकदा ाढदिवसाच्या खुप सार्‍या हरित शुभेच्छा..