शहरातून चोरीस गेलेल्या मोटर सायकलच्या शोध लावण्यास शहर पोलीस ठाण्याच्या डी .बी.पथकाला यश
शिरपूर प्रतिनिधी - 20 मार्च 2025 रोजी दुपारी 12 वाजेच्या सुमारास शिरपूर शहर पोलीस ठाण्यात पोलीस निरीक्षक किशोरकुमार परदेशी यांनी शिरपूर शहरातील सद्गुरू लॉज समोरून दुचाकी चोरीस गेल्याप्रकरणी दाखल गुन्हा शहर पोलिसांच्या डीबी पथकाने उघडकीस आणला असून 2 संशयितांना जेरबंद करीत त्यांच्या ताब्यातून विविध ठिकाणाहून चोरी केलेल्या 1 लाख 90 हजार रुपये किंमतीच्या 3 दुचाकी हस्तगत केल्याची माहिती प्रसिद्धी पत्रकान्वये दिली आहे. गोपाल भाईदास शिरसाठ वय 24 आणि सुनील मधुकर पवार वय 23 रा.पिळोदा ता शिरपूर यांना जेरबंद करून अटक करण्यात आली.
शिरपूर शहर पोलीस ठाण्याचे पोलीस निरीक्षक किशोरकुमार परदेशी यांना मिळालेल्या गोपनीय माहितीवरून 18 मार्च 2025 रोजी सायंकाळी गस्ती वरील डी.बी.पथकाला शहरातील खंडेराव मंदिराजवळ संशयीतरित्या एच एफ डिलक्स दुचाकीवरून फिरतांना आढळून आले.त्यांना विचारपूस केली मात्र समाधानकारक उत्तरे न मिळाल्याने सदर दुचाकीचे इंजिन व चेसिस नंबरवरून तपासणी केली असता 21 जानेवारी रोजी शहरातील सद्गुरू लॉज समोरून दुचाकी चोरीस गेल्याप्रकरणी शहर पोलीस ठाण्यात अज्ञात चोरट्यांविरुद्ध गुन्हा नोंद असल्याचे निष्पन्न झाल्याने संशयितांना अटक करण्यात आली.दरम्यान अधिक चौकशी केली असता संशयितांनी एकूण 1 लाख 90 हजार रुपये किंमतीच्या विविध ठिकाणाहून चोरी केलेल्या 3 दुचाकी काढुन दिल्याने त्या डीबी पथकाने ताब्यात घेतल्या.
सदरची कारवाई जिल्हा पोलीस अधिक्षक श्रीकांत धिवरे, अपर पोलीस अधिक्षक किशोर काळे आणि उपविभागीय पोलीस अधिकारी सुनील गोसावी यांचे मार्गदर्शनाखाली पोलीस निरीक्षक किशोरकुमार परदेशी यांच्या नेतृत्वाखाली पोहेकॉ राजेंद्र रोकडे, रविंद्र आखडमल,पोकॉ विनोद आखडमल, भटु साळुंके, योगेश दाभाडे, गोविंद कोळी, प्रशांत पवार, सचिन वाघ, आरीफ तडवी, मनोज महाजन, मनोज दाभाडे, तसेच होमगार्ड मिथुन पवार आणि राम भिल यांच्या पथकाने केली