राष्ट्रीय युवा दिनानिमित्त जैन मुलांच्या वक्तृत्व स्पर्धा संपन्न
शिरपूर : राष्ट्रीय युवा दिनाचे औचित्य साधत भारतीय जैन संघटना आणि ब्लेसिंग्स जैन संस्कार पाठशाला, शिरपूर यांच्या संयुक्त विद्यमाने, शिरपूरमधील जैन मुलांसाठी वक्तृत्व स्पर्धेचे आयोजन करण्यात आले होते. विद्यार्थ्यांच्या वक्तृत्व कौशल्याला चालना देण्यासाठी आणि त्यांच्यात आत्मविश्वास निर्माण करण्याच्या उद्देशाने आयोजित या स्पर्धेला पालक आणि विद्यार्थ्यांचा उत्स्फूर्त प्रतिसाद लाभला. ही स्पर्धा दोन गटांमध्ये विभागली गेली होती. पहिला गट ३ ते १० वर्षे वयोगटातील विद्यार्थ्यांसाठी होता, तर दुसऱ्या गटात १० वर्षांपेक्षा जास्त वयाचे विद्यार्थी सहभागी झाले. यामुळे मुलांना स्वतःची प्रतिभा सादर करण्याची, तसेच आपल्या ज्ञानाचे आणि कौशल्याचे प्रदर्शन करण्याची संधी मिळाली.
दिनांक १२ जानेवारी २०२५ रोजी नूतन जैन स्थानक, शिरपूर येथे सायंकाळी २ ते ३ या वेळेत ही स्पर्धा पार पडली. स्पर्धेत एकूण ३० हून अधिक विद्यार्थ्यांनी भाग घेतला. विद्यार्थ्यांनी विविध विषयांवर प्रभावी भाषणे दिली, ज्यामध्ये त्यांनी समाज, संस्कृती, धर्म आणि पर्यावरण यांसारख्या महत्त्वाच्या विषयांवर आपले विचार व्यक्त केले. या स्पर्धेतील बक्षिस वितरण समारंभ दिनांक २६ जानेवारी २०२५ रोजी पार पडला. बक्षिसांचे वितरण भारतीय जैन संघटनेच्या शिरपूर तालुका शाखा आणि धुळे जिल्हा (ग्रामीण) शाखेच्या सदस्यांच्या हस्ते करण्यात आले. प्रत्येक गटातील उत्कृष्ट वक्तृत्वासाठी प्रथम, द्वितीय व तृतीय क्रमांकासाठी बक्षिसे देऊन विद्यार्थ्यांचा गौरव करण्यात आला. विद्यार्थ्यांच्या मेहनतीचे आणि तयारीचे कौतुक करताना त्यांचे पालक आणि उपस्थित प्रेक्षकांनीही भरभरून दाद दिली.
या कार्यक्रमाचे मूल्यांकन प्रा. सचिन सुराणा सर यांनी केले. या यशस्वी कार्यक्रमाचे आयोजन भारतीय जैन संघटना, धुळे जिल्हा (ग्रामीण) अध्यक्ष संदीप मुनोत आणि शिरपूर तालुका अध्यक्ष मनोज बेदमुथा यांच्या नेतृत्वाखाली करण्यात आले. कार्यक्रमाचे सूत्रसंचालन डॉ. राकेश मुथा यांनी केले. या स्पर्धेमुळे विद्यार्थ्यांमध्ये आत्मविश्वास वृद्धिंगत होण्यास मदत झाली असून, भविष्यातही अशा स्पर्धांचे आयोजन करावे अशी सर्वांनी मागणी केली