*महाराष्ट्र विधानसभा निवडणूक 2024*
*निवडणूक कर्तव्य नाकारणाऱ्या कर्मचाऱ्यांवर शिस्तभंगाची कारवाई* *जिल्हाधिकारी तथा जिल्हा निवडणूक निर्णय अधिकारी जितेंद्र पापळकर यांचा इशारा*
धुळे, दिनांक 11 नोव्हेंबर, 2024 (जिमाका वृत्त) : विधानसभा सार्वत्रिक निवडणूक 2024 साठी येत्या 20 नोव्हेंबर, 2024 रोजी मतदान होणार आहे. निवडणुकीचे काम हे राष्ट्रीय कर्तव्य असून ही मतदान प्रक्रिया पार पाडण्याकामी विविध शासकीय, निमशासकीय आस्थापनांतील अधिकारी, कर्मचाऱ्यांची यासाठी नेमणूक करण्यात आली आहे. परंतु अनेकजण निवडणुकीचे काम नाकारत असून कामात टाळाटाळ करीत असल्याचे निदर्शनास येत आहे. पाच वर्षातून एकदा होणाऱ्या निवडणुकीतील या राष्ट्रीय कर्तव्यास नाकारणाऱ्या कर्मचाऱ्यांवर लोकप्रतिनिधीत्व अधिनियम 1951 चे कलम 134 नुसार शिस्तभंगाची कठोर कारवाई करण्यात येईल, असा इशारा जिल्हाधिकारी तथा जिल्हा निवडणूक अधिकारी जितेंद्र पापळकर यांनी दिला आहे.
मा. भारत निवडणूक आयोगामार्फत विधानसभा सार्वत्रिक निवडणूका 2024 चा कार्यक्रम घोषित केला आहे. धुळे जिल्ह्यातील 5 विधानसभा मतदारसंघात दि. 20 नोव्हेंबर रोजी 2024 रोजी मतदान प्रक्रिया पार पडणार आहे. तसेच 23 नोव्हेंबर 2024 रोजी मतमोजणी होणार आहे. धुळे जिल्ह्यात एकूण 1 हजार 753 मतदान केंद्रे असून मतदान प्रक्रिया सुरळीत पार पाडण्यासाठी मतदान केंद्राध्यक्ष, मतदान अधिकारी 1 ते 4, झोनल ऑफिसर, स्क्षूम निरिक्षक, बीएलओ व इतर मतदान अधिकारी असे एकूण 20 हजारपेक्षा अधिक कर्मचाऱ्यांची नियुक्ती करण्यात आली आहे. या कर्मचाऱ्यांचे दुसरे प्रशिक्षण देखील पूर्ण झाले आहे. परंतु अनेक कर्मचारी त्यांना प्राप्त झालेले निवडणूक कर्तव्य आदेश रद्द करण्यासाठी जिल्हाधिकारी कार्यालयात येत असल्याचे निदर्शनास येत असून अनेकजण आजारपणाचा दाखलाही घेवून येत असल्याची बाब समोर आली आहे. ज्यांच्या आरोग्यविषयक अडचणी खऱ्या आहेत त्यांच्याबाबतीत प्रशासनाने सहकार्याची भूमिका घेतली आहे. तथापि, निवडणूक प्रक्रिया पार पडण्यासाठी मनुष्यबळाची नितांत आवश्यकता असून कर्मचाऱ्यांकडून अशा पध्दतीचे वर्तन अपेक्षित नसल्याचेही जिल्हाधिकारी तथा जिल्हा निवडणूक निर्णय अधिकारी जितेंद्र पापळकर यांनी नमूद केले आहे.
निवडणुकीचे काम हे राष्ट्रीय कर्तव्य असून अशा प्रकारे जे कर्मचारी निवडणुकीसाठी त्यांना प्राप्त झालेले आदेश नाकारतील, निवडणूक प्रशिक्षणास गैरहजर राहतील अथवा निवडणुकीच्या कामात हयगय करतील. त्यांच्यावर लोकप्रतिनिधीत्व अधिनियम 1951 चे कलम 134 नुसार थेट कारवाई करावी, असे निर्देश धुळे जिल्ह्यातील पाचही विधानसभा मतदारसंघाच्या निवडणूक निर्णय अधिकाऱ्यांना जिल्हा निवडणूक कार्यालयामार्फत देण्यात आल्याचेही कळविण्यात आले आहे.