बदलापूरच्या नामांकित शाळेत चिमुरड्या मुलींचं लैंगिक शोषण, लाडक्या मुलीला न्याय देणार का? पालकांनी केला प्रश्न उपस्थित..
बदलापूर: माणसातली क्रूरता दिवसेंदिवस वाढत चालली असून कुठेतरी माणुसकीची भावना हरपत आहे अशाच घटना सध्या समाज माध्यमातून पहावयास मिळत आहे.
कोलकातामध्ये एका महिला डॉक्टरचा अमानुष छळ करुन तिची हत्या केल्याची घटना ताजी असतानाच मुंबईपासून काही अंतरावर असलेल्या बदलापूरमधील एका नामांकित शाळेत दोन अल्पवयीन मुलींवर लैंगिक अत्याचार झाल्याची धक्कादायक घटना नुकतीच समोर आली आहे.
या पार्श्वभूमीवर मंगळवारी बदलापूर बंदची हाक देण्यात आली आहे. त्याचप्रमाणे शाळेसमोर हजारोंच्या संख्येने पालक, राजकीय मंडळी आणि सामाजिक कार्यकर्त्यांनी शाळेसमोर आंदोलन सुरु केले आहे. पोलीस ठाण्यात तक्रार करण्यासाठी गेलेल्या मुलींच्या पालकांना तब्बल 12 तास ताटकळत ठेवण्यात आले होते असा देखील आरोप झाला आहे.
बदलापूरमधील एका नामांकित शाळेत साडेतीन वर्षाच्या दोन मुलींचे कंत्राटी सफाई कामगाराने शारीरिक शोषण केल्याने पालकवर्ग हादरला होता. या प्रकरणात अखेर 4 दिवसांनी शाळा प्रशासनाने आपली बाजू मांडली असून शाळेच्या मुख्याध्यापिकांना निलंबित, तर वर्गशिक्षिका आणि आया यांना थेट नोकरीवरून काढून टाकण्यात आलं आहे. तर आरोपी कंत्राटी सफाई कामगार ज्या कंत्राटदारामार्फत पुरवण्यात आला होता त्याच्यासोबतचा करारही शाळेने रद्द केला असून शाळेच्या सर्व पालक वर्गाची शाळेने जाहीर माफी मागितली आहे.
बदलापूर शहरातील एका जुन्या आणि नामांकित शाळेत हा संतापजनक प्रकार घडला होता. यानंतर पोलीस ठाण्यात तक्रार करण्यासाठी गेलेल्या मुलींच्या पालकांना तब्बल 12 तास ताटकळत ठेवण्यात आलं होतं. अखेर महाराष्ट्र नवनिर्माण सेनेच्या हस्तक्षेपानंतर रात्री एक वाजता पोलिसांनी गुन्हा दाखल केला होता. यावरून पोलीस प्रशासनाविरोधात संताप व्यक्त होताच वरिष्ठ पोलीस निरीक्षक शुभदा शितोळे यांची तडकाफडकी बदली करण्यात आली. तसेच बदलापूर पोलीस ठाण्यात दोन नवीन पोलीस निरीक्षक दर्जाच्या अधिकाऱ्यांची नियुक्ती करण्यात आली. आज बदलापूर बंदची हाक दिली आहे आंदोलन सुरु असून पोलिसांचा कडेकोट बंदोबस्त तैनात करण्यात आला आहे.
हे प्रकरण इतकं संवेदनशील असतानाही बदलापूर पूर्व पोलीस ठाण्याच्या वरिष्ठ पोलीस निरीक्षकानी गुन्हा दाखल करण्यासाठी 12 तासांचा अवधी घेतला. शिवाय शाळा प्रशासनाने हे प्रकरण दाबण्याचा प्रयत्न केला. त्यामुळे पालकांनी मंगळवारी सकाळी आक्रमक होत शाळेला जाब विचारण्यासाठी शाळेच्या गेटवर मोठी गर्दी केली आहे. शाळा प्रशासनाने येऊन आमच्याशी बोलावं अशी पालकांची मागणी केली. त्याचबरोबर आज नागरिकांनी बदलापूर बंदची हाक दिली आहे, या बदलापूर बंदमध्ये रिक्षा चालक, व्यापारी संघटना, शाळा बस चालक देखील सहभागी झालेत. घटनास्थळी सध्या पालक वर्ग शाळा प्रशासन आणि पोलीस प्रशासनाच्या विरोधात घोषणा देत आहेत.
या सर्व प्रकारात आता बदलापूर येथे रेल्वे मार्ग देखील थांबवण्यात आला व इथे देखील नागरिकांनी आंदोलन केले. एकीकडे राज्यात लाडक्या बहिणीच्या उदो उदो होत असताना लाडक्या मुलीचे काय? तिला न्याय देणार ? असा प्रश्न पीडित पालकांकडून उपस्थित केला गेला आहे. यावर विविध राजकीय पक्षांकडून देखील संताप जनक प्रतिक्रिया येत असून आरोपीला फाशी देण्याची मागणी पुढे होत आहे.