शहादा (प्रतिनिधी) :- जिल्हाधिकारी डॉ.राजेंद्र भारुड यांनी ' माझे कुटुंब माझी जबाबदारी ' मोहिमेचा आढावा घेण्यासाठी शहादा तालुक्याला भेट दिली . त्यांनी उपविभागीय कार्यालयात आयोजित बैठकीत मोहिमेचा आढावा घेतला . बैठकीस परिविक्षाधीन सहायक पोलीस अधीक्षक एम.रमेश , उपविभागीय अधिकारी डॉ.चेतन गिरासे , पोलीस उपअधीक्षक विक्रम कदम , तहसीलदार मिलींद कुलकर्णी , गट विकास अधिकारी पी.टी.गोस्वामी , नगर पालिकेचे मुख्याधिकारी राहुल वाघ , तालुका वैद्यकीय अधिकारी आर.एन.वळवी आदी उपस्थित होते .
डॉ.भारुड म्हणाले की, सर्वेक्षण करताना नागरिकांना आरोग्यासंदर्भात मार्गदर्शनही करावे . कोरोना बाधितांची संख्या अधिक असलेल्या गावात तापाच्या रुग्णांकडे विशेष लक्ष द्यावे . मोठ्या गावात अधिकाधीक व्यक्तींची स्वब चाचणी करण्यावर भर द्यावा . मोहिमेचे काम कालमर्यादेत पूर्ण करण्याबरोबर ऑनलाईन माहिती भरण्याचे कामही वेळेवर करावे , असे निर्देश त्यांनी दिले . चांगले काम करणाऱ्या अधिकाऱ्यांचे त्यांनी अभिनंदन केले .
जिल्हाधिकाऱ्यांनी मोहिदे गावाला भेट देऊन सर्वेक्षणाच्या कामाची पाहणी केली आणि आरोग्य कर्मचाऱ्यांना मार्गदर्शन केले . त्यांनी नागरिकांशी संवाद साधतांना मास्कचा वापर , शारीरिक अंतर राखणे आणि हात स्वच्छ धुण्याबाबत आवाहन केले . जिल्हाधिकारी भेटीला आल्याने नागरिकांनी समाधान व्यक्त केले . डॉ.भारुड यांनी शहादा तालुक्यातील शासकीय व खाजगी कोविड केअर सेंटरला भेट देऊन तेथील व्यवस्थेची पाहणी केली . त्यांनी नियोजित ग्रामीण रुग्णालय व नवीन उपविभागीय अधिकारी कार्यालयाला भेट देऊन तेथील कामाची पाहणी केली .
Tags
news