शिंदखेडा पोलिसांच्या सतर्कतेमुळे एटीएम चोरी ऐनवेळी टळली
चोरांचा डाव उधळला; ब्लॅक बोलेरो पिकअपसह आरोपी फरार
शिंदखेडा | प्रतिनिधी
शिंदखेडा पोलिस स्टेशनच्या अत्यंत सतर्क व जलद कारवाईमुळे स्टेट बँक ऑफ इंडियाच्या एटीएममधील तब्बल ₹९ लाख ६९ हजार रुपयांची मोठी चोरी ऐनवेळी टळली. मध्यरात्रीच्या सुमारास मिळालेल्या तांत्रिक अलर्टवर अवघ्या काही मिनिटांत घटनास्थळी पोहोचत पोलिसांनी चोरांचा डाव उधळून लावला. या घटनेमुळे शिंदखेडा तालुक्यात एकच खळबळ उडाली आहे.
तांत्रिक अलर्टमुळे घटना उघडकीस
आज पहाटे सुमारे २.३० वाजता, SIS सिक्युरिटी कॅश मॅनेजमेंट सिस्टम या कंपनीकडून गुरुग्राम (हरियाणा) येथून शिंदखेडा पोलिसांना तातडीचा फोन आला. शिंदखेडा तालुक्यातील एसबीआयच्या एका एटीएममध्ये छेडछाड झाल्याचा तांत्रिक अलर्ट प्रणालीद्वारे प्राप्त झाला होता.
४–५ मिनिटांत पोलिस घटनास्थळी
त्याच वेळी पीएसआय ठाकरे व शिंदखेडा पोलिसांचे पथक परिसरात रात्र गस्त घालत होते. माहिती मिळताच पेट्रोलिंग व्हॅन तात्काळ घटनास्थळी रवाना झाली. पोलिसांची चाहूल लागताच एटीएम उखडण्याचा प्रयत्न करणारे अज्ञात चोर ब्लॅक रंगाच्या बोलेरो पिकअप व्हॅनसह घटनास्थळावरून फरार झाले.
चोरांनी दोरीच्या सहाय्याने संपूर्ण एटीएम मशीन वाहनाला बांधून उखडण्याचा प्रयत्न केला होता. मात्र, पोलिसांच्या तत्परतेमुळे एटीएममधील संपूर्ण रक्कम सुरक्षित असल्याची अधिकृत माहिती देण्यात आली आहे.
नाकाबंदी, सीसीटीव्ही व फॉरेन्सिक तपास सुरू
घटनेनंतर शिंदखेडा परिसरात तसेच ग्रामस्थ आवाज परिसरात नाकाबंदी करण्यात आली आहे. प्रकरणाची माहिती संपूर्ण रेंजसह मध्यप्रदेश व गुजरात पोलिसांना देण्यात आली आहे.
एटीएम परिसरातील तसेच टोल नाक्यांवरील सीसीटीव्ही फुटेज ताब्यात घेण्यात आले असून, फॉरेन्सिक पथक घटनास्थळी तपास करत आहे. संशयित वाहनाच्या हालचालींचा माग काढण्यासाठी सर्व यंत्रणा कार्यान्वित करण्यात आल्या आहेत.
शिंदखेडा पोलिसांच्या सतर्कतेचे सर्वत्र कौतुक
अवघ्या काही मिनिटांत घटनास्थळी पोहोचून मोठी चोरी रोखल्याबद्दल शिंदखेडा पोलिसांच्या तत्परतेचे व सतर्कतेचे सर्वत्र कौतुक होत आहे. या कारवाईमुळे नागरिकांमध्ये पोलिसांविषयीचा विश्वास अधिक दृढ झाला आहे.पुढील तपास शिंदखेडा पोलिस स्टेशनकडून सुरू आहे.