मुलानेच 78 वर्षाच्या वृद्ध वडिलांना विळा मारून केले जखमी नांदुरा शहरातील घटना मलकापूर - उमेश ईटनारे

: पोलीस ठाण्यात माझ्याविरुद्ध दिलेली तक्रार मागे घ्या , असे म्हणत मुलानेच ७८ वर्षांच्या वृद्ध वडिलांना विळा मारून जखमी केले . ही घटना काल , ३ फेब्रुवारी रोजी दुपारी एकच्या सुमारास नांदुरा शहरातील वॉर्ड क्रमांक ६ मध्ये घडली . या प्रकरणी आज , ४ फेब्रुवारी वृद्ध वडिलांच्या तक्रारीवरून नांदुरा पोलीस ठाण्यात मुलाविरुद्ध गुन्हा दाखल करण्यात आला आहे . शत्रुघ्न तुकाराम वाकुडकर ( ७८ , रा . वॉर्ड क्र . ६ , नांदुरा ) यांनी नांदुरा पोलीस ठाण्यात तक्रार दिली . ते त्यांच्या नातवाला विळ्याने ऊस कापून देत होते . त्यावेळी त्यांचा मुलगा हा घराच्या वरच्या मजल्यावरून हातात काठी घेऊन आला . तुम्ही माझ्याविरुद्ध दिलेली तक्रार परत घ्या , असे म्हणत काठीने मारहाण केली . त्यानंतर विळा हिसकावून वृध्द बापाला विळा मारून जखमी केले . तुम्ही तक्रार मागे घेतली नाही तर तुम्हाला अन् तुमच्या बायकोलाही मारीन , अशी धमकी मुलाने दिल्याचे वडिलांनी तक्रारीत म्हटले आहे . तक्रारीवरून पोलिसांनी अनंत शत्रुघ्न वाकुडकर ( ३४ ) याच्याविरुद्ध गुन्हा दाखल केला आहे .