शिरपूर भाजपा तर्फे वीजबिल सवलतीसाठी सोमवारी वीजबिल होळी आंदोलन, नागरिकांना सहभागी होण्याचे आवाहन

 

शिरपूर : राज्यातील शिवसेना, काँग्रेस, राष्ट्रवादी काँग्रेस आघाडी सरकारला वीजबिलात सवलत देण्यास भाग पाडण्यासाठी सोमवार दि. २३ नोव्हेंबर रोजी भारतीय जनता पार्टीतर्फे राज्यात सर्वत्र वीजबिल होळी आंदोलन करण्यात येणार असून नागरिकांनी मोठ्या संख्येने सहभागी व्हावे असे आवाहन भाजपा महा प्रदेश सदस्य बबनराव चौधरी यांनी प्रसिध्दी पत्राव्दारे केले आहे.

भाजपा महाराष्ट्र प्रदेश सदस्य बबनराव चौधरी यांनी प्रसिध्दी पत्रात म्हटले आहे की, लॉकडाऊनच्या काळात राज्यातील नागरिकांना भरमसाठ वीजबिले आली. याबाबत सवलत देण्याचे महाविकास आघाडी सरकारने जाहीर केले होते. पण आता या सरकारच्या ऊर्जामत्र्यांनीच स्वतः वीजबिलाबाबत दिलासा देता येणार नाही व नागरिकांना ती भरावी लागतील, असे स्पष्ट सांगितले आहे. दुसरीकडे महावितरण सक्तीने वीजबिले वसूल करण्याच्या प्रयत्नात आहे. महाविकास आघाडी सरकारने जनतेचा विश्वासघात केला आहे. या सरकारला सत्तेच्या धुंदीतून जागे करण्यासाठी भाजपा वीजबिलांच्या होळीचे आंदोलन राज्यात सर्वत्र करणार आहे. लॉकडाऊनच्या काळात आर्थिक व्यवहार ठप्प होऊन नागरिकांना फार मोठा आर्थिक ताण सहन करावा लागला. अशा परिस्थितीत राज्यातील महाविकास आघाडी सरकारने इतर राज्यांप्रमाणे हातावर पोट असणारे श्रमिक, रस्त्यावरील व्यावसायिक, बारा बलुतेदार, शेतकरी, रिक्षाचालक, टॅक्सी चालक इत्यादींना स्वतःहून पॅकेज द्यायला हवे होते. या सरकारने अजूनही जनतेला पॅकेज दिलेले नाही. उलट वीज कंपन्यांच्या भोंगळ कारभारामुळे भरमसाठ वीजबिले आली. त्या बाबत रास्त सवलत देण्यास ही सरकार तयार नाही. म्हणुन भाजपाने या प्रश्नावर जनहितासाठी रस्त्यावर उतरण्याचा निर्णय घेतला आहे. ठिकठिकाणी भाजपाचे कार्यकर्ते सोमवारी वीजबिलांची होळी करून सरकारचे लक्ष वेधतील. जनतेने या आंदोलनाला पाठिंबा द्यावा असे आवाहान हि  भाजपा महाराष्ट्र प्रदेश सदस्य बबनराव चौधरी यांनी केले आहे.